کۆنفرانسێ زانكۆیا زاخۆ

زانكۆیا زاخۆ ل سالا 2013 یه‌كه‌مین كونفراسێ زانستى یێ نیڤ ده‌وله‌تى ئه‌نجامدا

(23)ێ نیسانا سالا (2013)

ل ژێر چاڤدێریا به‌رێز "نێچیرڤان بارزانى" سه‌رۆكێ حكۆمه‌تا هه‌رێما كوردستانێ و ب ئاماده‌بوونا به‌رێز پرۆفیسۆر "عه‌لى سه‌عید" وه‌زیرێ وه‌زاره‌تا خواندنا بلند و ڤه‌كۆلینێن زانستى یا سه‌ر ب حكۆمه‌تا هه‌رێما كوردستانێڤه‌، ل رۆژا سێ شه‌مبێ رێكه‌ڤتى (23)ێ نیسانا سالا (2013)ێ ڕێوره‌سمێ ڤه‌كرنا یه‌كه‌مین كۆنفرانسێ زانستى یێ نیڤده‌وله‌تى ل زانكۆیا زاخۆ هاته‌ برێڤه‌برن. د ئه‌ڤى كۆنفرانسیدا نوینه‌رێن پتر ژ "بیست و پێنچ" زانكۆیێن كوردستانێ و ئیراقێ پشكداربوون، هه‌روه‌سا نوینه‌ر و ڤه‌كۆله‌ر پتر ژ "بیست و ئێك" زانكۆ و په‌یمانگه‌هێن ڤه‌كۆلینان ژ "چوارده‌" وه‌لاتان ل ئه‌ڤى كۆنفرانسێ زانستى به‌شدارببوون. ڕێوره‌سمێن ڤه‌كرنا كۆنفرانسى ب سروودا نشتیمانى یا ئیراقێ و هه‌رێما كوردستانێ ده‌ستپێكر، پشتى سروودێن نشتیمانى ب داوى هاتین، به‌رێز پرۆفیسۆر "عه‌لى سه‌عید" په‌یڤه‌ك پێشكێشكر و د په‌یڤا خۆ دا داكوكى ل سه‌ر ئاستێ زانكۆیان د ڕۆژه‌ڤا هه‌رێما كوردستانێدا كر و ئاماژه‌ ب ئه‌وێ چه‌ندێ دا، كو پێدڤییه‌ پێنگاڤێن باشتر ژبۆ ئاڤاكرن و پێشخستنا زانكۆیان ل هه‌رێما كوردستانێ بهێن هاڤێتن. پاشان به‌رێز دكتۆر "له‌زگین عه‌بدى جه‌میل" سه‌رۆكێ زانكۆیا زاخۆ په‌یڤه‌ك خواند و د په‌یڤا خۆ دا ئاماژه‌ ب ئه‌وێ چه‌ندێ دا، كو ئه‌ڤ كۆنفرانسه‌ بۆ جارا ئێكێ و د ته‌مه‌نێ "سێ" سالییا زانكۆیا زاخۆ دا دهێته‌ ئه‌نجامدان و ئه‌ڤ چه‌نده‌ ژى بۆ زانكۆیا مه‌ ده‌ستكه‌ڤته‌ك مه‌زن و ب بوهایه‌، هه‌روه‌سا سه‌رۆكێ زانكۆیێ داكوكى لسه‌ر شیانێن زانكۆیێ ژبۆ وه‌رگرتنا (2600) قۆتابیێن به‌كالۆریۆس و (100) قۆتابیێن ماسته‌ر و دكتۆرایێ كر، سه‌رۆكێ زانكۆیێ ئه‌و چه‌نده‌ ژى ڕوونكر كو زانكۆیا زاخۆ د قۆناغا به‌رفره‌هبوونێدایه‌ ب ئاڤاكرنا سه‌نته‌رێن ڤه‌كۆلینان، سه‌نته‌رێن قۆتابیان، هۆلا كۆنفرانسان، پشكێن نوى یێن خواندنێ دگه‌ل ئاماده‌كرنا مامۆستا و پێدڤیێن پشكان.
ل داوییێ سه‌رپه‌رشتیارێ كۆنفرانسى پرۆفیسۆر "عمر حبیب" په‌یڤا خۆ خواند و ب ناڤێ ده‌سته‌یا سه‌رپه‌رشتیارا كۆنفرانسى بخێرهاتنا وه‌زیرێ خواندنا بلند و ڤه‌كولینێن زانستى، نوینه‌رێن زانكۆیان و ته‌ڤایا مێهڤانان كر، پاشان ده‌رباره‌یى كۆنفرانسى په‌یڤى و ئه‌و چه‌نده‌ ڕوونكر كو "سێ سه‌د" ڤه‌كۆلینێن زانستى پتر ژ "پێنجى" زانكۆ و سه‌نته‌رێن ڤه‌كۆلینان ل "پازده‌" وه‌لاتان هاتینه‌ وه‌رگرت.
ئه‌ڤ ڤه‌كۆلینه‌ د "پێنجى و دوو" سمینارێن تایبه‌ت و "سێ" سمینارێن گشتيدا هاتنه‌ پێشكێشكرن، هه‌ژى ئاماژه‌ پێدانێیه‌، كو ئه‌ڤ كۆنفرانسه‌ بۆ ماوێ "سێ" ڕۆژان یێ به‌رده‌وامبوو.