<< نووچەیێن

زانكۆیا زاخۆ به‌شدارى د كۆنفرانسێ نیڤده‌وله‌تى یێ پێشكه‌ڤتنا به‌رده‌وام د ئاڤاهیى و ژینگه‌هێدا SUDB

16 September 2015

دكتۆر (كامل منصور یوسف) مامۆستا ل پشكا زانستێن ژینگه‌هێ ل زانكۆیا زاخۆ، به‌شدارى د حه‌فته‌مین كۆنفرانسێ نیڤده‌وله‌تى ئه‌وێ لژێر ناڤونیشانێ "پێشكه‌ڤتنا به‌رده‌وام د ئاڤاهیى و ژینگه‌هێدا SUDBE 2015" كر، ئه‌ڤ كۆنفرانسه‌ ل ڕێكه‌ڤتى 27ـ29/7/2015 باژێرێ (ڕیدینك) ل وه‌لاتێ بریتانیا هاته‌ ئه‌نجامدان. هه‌ژى ئاماژه‌پێدانێیه‌ دكتۆر (كامل منصور یوسف) و مامۆستا (منیر ئه‌یوب) ب بابه‌تێ لژێر ناڤونیشانێ (پیڤه‌رێ ڕه‌سه‌نییا ئاڤێ د ڕووبارێ خابوورێ بچویك ل باژێرێ زاخۆ ـ هه‌رێما كوردستانێ) پشكدارى د كۆنفرانسیدا كربوون، ئه‌ڤ كۆنفرانسه‌ ژ ئالییێ "زانكۆیا ڕیدینك، زانكۆیا كامبرێج ـ بریتانیا و زانكۆیا چوونگ كوینك یا چینى" هاتبوو رێكخستن، ئه‌ڤى كۆنفرانسى گرنگى و تایبه‌تمه‌ندیا خۆ هه‌بوو، ژبه‌ركو هزر و بۆچوونێن جودا گه‌هاندن هه‌ڤ، ئه‌ڤ چه‌نده‌ ژى ڕامانا سه‌ركه‌ڤتنا كۆنفرانسى دگه‌هینت. هه‌ژییه‌ بێژین ئه‌ڤ كۆنفرانسه‌ لژیر ناڤونیشانێ پێشكه‌ڤتنا به‌رده‌وام د ئاڤاهیى و ژینگه‌هێد (SUDBE 2015) ژ گه‌له‌ك بابه‌تێن لسه‌ر به‌رده‌وامبوونا پێشڤه‌چوونا باژێر و ئاڤاهییان پێكدهات. د ئه‌ڤى كۆنفرانسيدا ڤه‌كوله‌رێن پسپۆر و ناڤدار ژ زانكۆیان، په‌یمانگه‌هان و كه‌رتێن پێشه‌سازى ل وه‌لاتێن جوراوجور دیت و بۆچوونێن خۆ ب ئاوایه‌كێ ئاكادیمى پێشكێشكى ئاماده‌بوویان كرن، هه‌روه‌سا ئه‌ڤ كۆنفرانسه‌ ده‌لیفه‌كا باشبوو بۆ دیاركرنا ته‌كنۆلۆژیا نوى و به‌رهه‌مێن نوى یێن كۆمپانییان ...هتدد، ئه‌ڤ كۆنفرانسه‌ یێ چالاك و ئه‌كتیڤبوو، هه‌روه‌سا ده‌رفه‌ته‌كا باش یا زانستى بۆ نویكرنا زانیاریان ده‌رباره‌یى ته‌كنۆلۆژیا به‌رده‌وام دبوارێ ئاڤاكرنا شارستانى و ته‌كنۆلۆژیێن ژینگه‌هێدا ڕه‌خساند. په‌نالێن ته‌كنیكى یێن ئه‌ڤى كۆنفرانسێ نیڤده‌وله‌تى ژ ئه‌ڤان بابه‌تان پێكدهات: پێشكه‌ڤتنا به‌رده‌وام د ئاڤاهیاندا، ڕێژا كێمبوونا كاربوونێ و ژینگه‌ها كه‌سك د ئاڤاهییاندا، ئاسایشا ئاڤێ و ژینگه‌هێ بۆ نموونه‌ (‌كۆنترۆلكرنا پیسبوونا ئاڤێ و پاراستنا ژێده‌رێ ئاڤێ، ڤه‌خوارنا ئاڤێ ب شێوه‌یه‌كێ ته‌ندورست، سیسته‌مێ به‌رده‌وام بۆ به‌لاڤكرنا ئاڤێ ...هتد).