<< نووچەیێن

ل زانكۆیا زاخۆ دووه‌مین كۆنفرانسێ زانستیێ نیڤده‌وله‌تى هاته‌ گێران

18 April 2017

ل ڕۆژا سێشه‌مبێ ڕێكه‌ڤتى 18/4/2017 لده‌مژمێر (10:00) سپێدێ، ب ئاماده‌بوونا به‌رێز دكتۆر (كریم عبدول) نوینه‌رێ وه‌زیرێ خواندنا بلند و ڤه‌كۆلینێن زانستى و به‌رێز دكتۆر (عصمت محمد خالد) ڕاوێژكارێ سه‌رۆكێ كۆمارا عیراقێ و به‌رێز پرۆفیسۆرێ هاریكار دكتۆر (لزگین عبدى جمیل) سه‌رۆكێ زانكۆیا زاخۆ و هاریكارێن سه‌رۆكێ زانكۆیێ بۆ كاروبارێن زانستى و قۆتابییان، ڕاگرێن كۆلیژ و فه‌كۆلتیان، ئه‌ندامێن په‌رله‌مانێ كوردستانێ، ئه‌ندامێن دووه‌مین كۆنفرانسێ زانستیێ نیڤده‌وله‌تى، ڕێڤه‌به‌رێن داموده‌زگه‌هێن حكومى، ده‌زگه‌هێن ڕاگه‌هاندنێ، مامۆستا و قۆتابیێن زانكۆیا زاخۆ و مێهڤانێن هێژا یێن ناڤخۆ و ده‌رڤه‌یى هه‌رێما كوردستانێ، دووه‌مین كۆنفرانسێ زانستیێ نیڤده‌وله‌تى یێ زانكۆیا زاخۆ لژێر دوريشمێ (زاخۆ: ژيان، شارستانى و كه‌لتوور) ل هۆلا كۆنفرانسان ل فه‌كۆلتیا زانست هاته‌ گێران.
لده‌ستپێكێ ئاماده‌بوویێن دووه‌مین كۆنفرانسێ زانستیێ نیڤده‌وله‌تى خوله‌كه‌كێ ب بێده‌نگى دگه‌ل سروودا نیشتیمانیا كوردستانێ لسه‌ر گیانێ ته‌ڤایا جانگۆریێن بزاڤا ڕزگاریخوازا گه‌لێ كورد ڕاوه‌ستیان، پاشان ڕێوره‌سمێن دووه‌مین كۆنفرانسێ زانستیێ نیڤده‌وله‌تى ب په‌یڤا ڕێزدار پرۆفیسۆرێ هاریكار دكتۆر (لزگین عبدى جمیل) سه‌رۆكێ زانكۆیا زاخۆ ده‌ستپێكر، به‌رێزى د په‌یڤا خۆ دا بخێرهاتنا ته‌ڤایا مێهڤانێن ئاماده‌بوویى یێن دووه‌مین كۆنفرانسێ زانستیێ نیڤده‌وله‌تى كر، پاشان ب ئاوایه‌كێ هویربین باسێ كۆنفرانسێ زانستیێ زانكۆیا زاخۆ و ئارمانجێن زانستیێن كۆنفرانس كر، هه‌روه‌سا سه‌رۆكێ زانكۆیا زاخۆ گۆت: جودایى ئارمانجێن زانستیێن كۆنفرانسى و گرێدانا چه‌ندین پرۆتۆكۆلێن زانستى دگه‌ل زانكۆیان، چه‌ندین ئارمانجێن دیتر ژى مه‌ هه‌نه‌، وه‌ك ب هه‌ڤگه‌هاندنا ڤه‌كۆله‌ران و هه‌ڤنیاسینا وان دگه‌ل هه‌ڤ و سازكرنا چه‌ندین په‌نه‌ل و ووركشۆپێن تایبه‌ت، هه‌روه‌سا خۆرتكرنا تێكه‌لیان دناڤبه‌را كه‌سانێن پسپۆر و خودان ئه‌زموون د بوارێن جوداجودا یێن زانستى و ژیانێدا. ژ ئالییه‌كێ دیتر پرۆفیسۆرێ هاریكار گۆت: ئارمانجا سه‌ره‌كى یا ئه‌ڤى كۆنفرانسى ئه‌وه‌ كو ژ نێزیك هایدارى ڕه‌وشا زانكۆیان و پرۆسێسا زانستى ببن، هه‌روه‌سا ڕۆلێ ڤه‌كۆلین و ڤه‌كۆله‌ران د پێشخستنا زانستیدا به‌رچاڤ بكه‌ن. لدووماهییا په‌یڤا خۆ به‌رێزى ئاماژه‌ ب ئه‌ڤێ یه‌كێ دا، كو بۆ سالا بهێت دێ چه‌ندین كۆلیژێن تایبه‌ت وه‌ك (كۆلیژا پزیشكى، كۆلیژا په‌روه‌ردا بنیات) ل زانكۆیا زاخۆ هێنه‌ ڤه‌كرن.
پشتى په‌یڤا به‌رێز سه‌رۆكێ زانكۆیا زاخۆ ب دووماهیك هاتى، به‌رێز دكتۆر (كه‌ریم عبدول) نوینه‌رێ وه‌زیرێ خواندنا بلند و ڤه‌كۆلینێن زانستى په‌یڤه‌ك پێشكێشكر و د په‌یڤا خۆ دا خۆشحالیا خۆ ب دووه‌مین كۆنفرانسێ زانستیێ نیڤده‌وله‌تى ده‌ربرى و گۆت: زانكۆیا زاخۆ پێنگاڤێن هه‌رى باش د وارێ زانین و زانستێدا هاڤێتینه‌ و ئه‌ڤ یه‌كه‌ ژى جهێ خۆشحالیا مه‌ یه‌. هه‌روه‌سا نوینه‌رێ وه‌زیرێ خواندنا بلند ئاماژه‌ ب ئه‌ڤێ چه‌ندێ دا كو د دووه‌مین كۆنفرانسێ زانستیێ زانكۆیا زاخۆ دا چه‌ندین ڤه‌كۆلینێن ئاست به‌رز ژ ناڤخۆ و ده‌رڤه‌یى هه‌رێما كوردستانێ به‌شدارن، هه‌لبه‌ت ئه‌ڤ چه‌نده‌ ژى جهێ به‌خته‌وه‌ریێ و پێشخستنا پرۆسێسا زانستیه‌ ل هه‌رێما كوردستانێ. ده‌رباره‌ى زانكۆیا زاخۆ به‌رێزى گۆت: زانكۆیا زاخۆ ل گوره‌یى ته‌مه‌نێ خۆ یێ بچویك پێنگاڤێن مه‌زن و زانستیانه‌ هاڤێتینه‌، له‌ورا داخوازا سه‌ركه‌ڤتنێ بۆ زانكۆیا زاخۆ و ستافێ زانكۆیێ دكه‌ن.
پاشان به‌رێز دكتۆر (عمر الحبیب) په‌یڤا دووه‌مین كۆنفرانسێ زانستیێ زانكۆیا زاخۆ خواند، و د په‌یڤا خۆ دا ئاماژه‌ ب پرۆسێسا سازكرنا كۆنفرانسى و قۆناغێن كاركرن و وه‌رگرتنا ڤه‌كۆلینان دا و گۆت: پتر ژ (200) ڤه‌كۆلینان ژ زانكۆ و وه‌لاتێن جوداجودا بۆ كۆنفرانسى هاتینه‌، به‌لى مه‌ بتنێ (160) ڤه‌كۆلین په‌ژراندینه‌ و ئه‌ڤ ڤه‌كۆلینه‌ دێ د (36) ڕوینشتناندا هێنه‌ پێشكێشكرن. هه‌روه‌سا گۆت: (20) ڤه‌كۆله‌رێن هه‌ڤپشك ژ وه‌لاتێن جوداجودا یێن جیهانێ وه‌ك (مالیزیا، ئیران، توركیا و وه‌لاتێن ئه‌ورۆپى) د كۆنفرانسێ زانستیدا پشكدارن و ئه‌ڤ یه‌كه‌ ژى ده‌رفه‌ته‌كه‌ بۆ هه‌ڤنیاسینا ڤه‌كۆله‌ران دگه‌ل یه‌ك و دورستكرنا په‌یوه‌ندیێن زانستى. پشتى په‌یڤێن لسه‌رى ب دووماهیك هاتین، به‌لگه‌ و دیكیۆمێنته‌ك بۆ جارا یه‌كه‌مین ده‌رباره‌ى دیرۆكا باژێرێ (زاخۆ) هاته‌ نمایشكرن، د ئه‌ڤى به‌لگه‌ و دیكیۆمێنتیدا چه‌ندین زانیاریێن گرنگ سه‌باره‌ت دیرۆكا باژێرێ زاخۆ و قۆناغێن گه‌شه‌كرن و پێشكه‌ڤتنا باژێرى هاتنه‌ دیاركرن و ب ئه‌ڤێ چه‌ندێ ئاماده‌بوویان چه‌ندین زانیاریێن گرنگ سه‌باره‌ت باژێرێ زاخۆ وه‌رگرتن.
هه‌ژییه‌ بێژین، كو پشتى ئه‌ڤ ڕێوره‌سمێن لسه‌رى دیاركرى ب داوى هاتین، سمینار و په‌نه‌لێن دووه‌مین كۆنفرانسێ زانستیێ نیڤده‌وله‌تى ده‌ستپێكرن، پاشان دانوستاندن لسه‌ر بابه‌ت و ڤه‌كۆلینان هاته‌كرن. لدووماهییێ فه‌ره‌ بهێته‌گۆتن كو ماوه‌یێ دووه‌مین كۆنفرانسێ زانستیێ نیڤده‌وله‌تى یێ زانكۆیا زاخۆ سێ ڕۆژن و دێ د ئه‌ڤا سێ ڕۆژاندا چه‌ندین ڤه‌كۆلین د بوارێن (ژینگه‌هـ، مێژوو، زانستێن مرۆڤایه‌تى، زانستێ ئه‌ندازیاريا په‌ترۆلێ، زانست، هۆنه‌ر، په‌روه‌رده‌ و كارگێريێ) دا هێنه‌ پێشكێشكرن.