<< نووچەیێن

دووه‌مين كۆنفرانسێ زانستيێ نيڤده‌وله‌تى ل زانكۆيا زاخۆ به‌رده‌وامه‌

19 April 2017

ل ڕۆژا چوارشه‌مبێ ڕێكه‌ڤتى 19/4/2017 لده‌مژمێر (10:00) سپێدێ، ب ئاماده‌بوونا به‌رێز پرۆفیسۆرێ هاریكار دكتۆر (لزگین عبدى جمیل) سه‌رۆكێ زانكۆیا زاخۆ و هاریكارێن سه‌رۆكێ زانكۆیێ بۆ كاروبارێن زانستى و قۆتابییان، ڕاگرێن كۆلیژ و فه‌كۆلتیان، ئه‌ندامێن دووه‌مین كۆنفرانسێ زانستى، مامۆستایێن زانكۆیێ، ده‌زگه‌هێن ڕاگه‌هاندنێ و مێهڤانێن كۆنفرانسى بۆ ڕۆژا دووه‌مین بزاڤ و چالاكى، سمینار، ووركشۆپ و دیبه‌یتێن دووه‌مین كۆنفرانسێ زانستیێ نیڤده‌وله‌تى یێ زانكۆیا زاخۆ ئه‌وێ لژێر دوریشمێ (زاخۆ: ژیان، شارستانى و كه‌لتوور) ل ته‌ڤایا فه‌كۆلتى و كۆلیژێن زانكۆیا زاخۆ به‌رده‌وامه‌.
لده‌ستپێكێ ل هۆلا كۆنفرانسان ل ئاڤاهییێ فه‌كۆلتیا زانست ڕێوره‌سمێن كۆنفرانسى ب سروودا نیشتیمانییا كوردستانێ ده‌ستپێكرن و فیلمێ دیكیۆمێنتارى ئه‌وێ لسه‌ر دیرۆك و ژیانا باژێرێ زاخۆ هاته‌ نمایشكرن، پاشان دیبه‌یته‌ك تایبه‌ت ده‌رباره‌ى باژێرێ زاخۆ و گرنگییا باژێرێ زاخۆ بۆ حكومه‌تا هه‌رێما كوردستانێ ب ڕێڤه‌به‌ریا پرۆفیسۆرێ هاریكار دكتۆر (ئه‌حمه‌د سلێمان صفار) هاته‌ سازكرن. هه‌ژییه‌ بێژین كو ئه‌ندامێن دیبه‌یتێ پێكهاتبوون ژ به‌رێزان پرۆفیسۆرێ هاریكار دكتۆر (له‌زگین عبدى جمیل) سه‌رۆكێ زانكۆیا زاخۆ، (سه‌عید حاجى سه‌دیق) كه‌سایه‌تییێ به‌رنیاس ل باژێرێ زاخۆ و مێژوونڤیس، (بژار مونیب) سه‌رۆكێ باژێرڤانیا زاخۆ، (فه‌هیم عه‌بدولا حه‌مو) سه‌رۆكێ جڤاتا پارێزگه‌ها دهۆكێ و به‌رێز (عه‌لى عه‌لى هالو) ئه‌ندامێ په‌رله‌مانێ كوردستانێ. جهێ ئاماژه‌پێدانێیه‌ كو ئه‌ندامێن دیبه‌یتێ ژ گۆشه‌نیگایێن جوداجودا ل باژێرێ زاخۆ نێرین و هه‌ر یه‌كێ ژ ئالییه‌كێ باسێ گرنگى، ڕه‌وش و پاشه‌رۆژا باژێرێ زاخۆ كرن.
هه‌روه‌سا پشتى دیبه‌یت ب دووماهیك هاتى، مێهڤانێن كۆنفرانسى سه‌ره‌دانا چه‌ندین كۆلیژ و فه‌كۆلتیان و جهێن گێرانا كۆنفرانسى كرن و د چه‌ندین چالاكى و بزاڤێن زانستى یێن جوداجودا دا پشكداربوون و دانوستاندن لدوور چه‌ندین ڤه‌كۆلینێن هاتینه‌ پێشكێشكرن كرن.