<< نووچەیێن

دووه‌مین كۆنفرانسێ زانستیێ نیڤده‌وله‌تى یێ زانكۆیا زاخۆ ب دووماهیك هات

20 April 2017

ل ڕۆژا پێنجشه‌مبێ ڕێكه‌ڤتى 20/4/2017 لده‌مژمێر (10:00) سپێدێ، ب ئاماده‌بوونا به‌رێز پرۆفیسۆرێ هاریكار دكتۆر (لزگین عبدى جمیل) سه‌رۆكێ زانكۆیا زاخۆ و هاریكارێن سه‌رۆكێ زانكۆیێ بۆ كاروبارێن زانستى و قۆتابییان، ڕاگرێن كۆلیژ و فه‌كۆلتیان، ئه‌ندامێن دووه‌مین كۆنفرانسێ زانستیێ نیڤده‌وله‌تى، ڕێڤه‌به‌رێن داموده‌زگه‌هێن حكومى، كه‌نالێن ڕاگه‌هاندنێ، مامۆستا و قۆتابیێن زانكۆیێ و مێهڤانێن هێژا ڕێوره‌سمێن ڕۆژا دووماهییێ ژ دووه‌مین كۆنفرانسێ زانستیێ نیڤده‌وله‌تى یێ زانكۆیا زاخۆ ئه‌وێ لژێر دوریشمێ (زاخۆ، ژیان، شارستانى و كه‌لتوور) برێڤه‌چوون.
لده‌ستپێكێ چه‌ندین ڤه‌كۆلین ژ لایێ مامۆستا و ڤه‌كۆله‌رێن پشكدار د كۆنفرانسیدا هاتنه‌ پێشكێشكرن، پاشان سیمپۆزیومه‌ك ده‌رباره‌ى (ڕه‌وشا چاپ و وه‌شانێ ل هه‌رێما كوردستانێ) كو ژ دوو په‌نه‌لان پێكهاتبوو ل هۆلا (خه‌لیل خه‌یالى) ل فه‌كۆلتیا زانستێن مرۆڤایه‌تى هاته‌ سازكرن. په‌نه‌لێ ئێكێ بۆ ده‌زگه‌هێن (ته‌فسیر ـ هه‌ولێر، ئێكه‌تیا نڤێسه‌ران ـ دهۆك جه‌مال عیرفان ـ سلێمانى، ڕێڤه‌به‌ریا چاپ و به‌لاڤكرنێ ـ دهۆك) كو نوینه‌رێن وان ده‌زگه‌هان باسێ مێژوویا دامه‌زراندن و كار و بزاڤێن خۆ كرن، هه‌روه‌ها ئاماژه‌ ب مه‌رج و ڕێنمایێن چاپ و به‌لاڤكرنا په‌رتووكان و پلانێن خۆ یێن پاشه‌رۆژێ دان، ب هه‌مان شێوه‌ په‌نه‌لێ دووێ بۆ ده‌زگه‌هێن (ژین ـ سلێمانى، سپیرێز ـ دهۆك، موكریان ـ هه‌ولێر، نالبه‌ند ـ دهۆك) هاته‌ سازكرن و نوینه‌رێن ده‌زگه‌هان ب ئاوایه‌كێ هویربین باسێ پرۆسێسا كاركرنێ و ئاسته‌نگێن د كاریدا په‌یدادبن كرن. فه‌ره‌ بهێته‌گۆتن كو پشتى هه‌ر دوو په‌نه‌ل ب دووماهیك هاتین، ده‌رگه‌هێ دانوستاندنێ هاته‌ ڤه‌كرن و چه‌ندین پرسیارێن گرنگ سه‌باره‌ت ڕه‌وشا چاپه‌مه‌نییێ ل هه‌رێما كوردستانێ هاتنه‌ ئازراندن.
پشتى سیمبۆزیوم ب دووماهیك هاتى، ڤه‌كۆله‌ر و ئه‌ندامێن دووه‌مین كۆنفرانسێ زانستیێ نیڤده‌وله‌تى ب هه‌ڤرا چه‌ندین وێنه‌ گرتن و قه‌ستا سرۆشتێ كوردستانێ گۆندێ (بێتاسێ) كرن و ڕێوره‌سمێن ب دووماهیك هینانا كۆنفرانسى دگه‌ل خوارنا فراڤینێ ل ئه‌وێ ده‌رێ هاتنه‌ گێران. هه‌روه‌سا په‌یڤا ب دووماهیك هاتنا كۆنفرانسى ژ لایێ به‌رێز پرۆفیسۆرێ هاریكار دكتۆر (لزگین عبدى جمیل) سه‌رۆكێ زانكۆیا زاخۆ هاته‌ پێشكێشكرن، به‌رێزى د په‌یڤا خۆ دا سۆپاسیا ته‌ڤایا ئه‌ندامێن كۆنفرانسى، لیژنه‌یێن سازكرنا كۆنفرانسى و ستافێ زانكۆیا زاخۆ كر، هه‌روه‌سا باسێ ئارمانجێن بجهاتى یێن كۆنفرانسى و پلانێن داهاتى و به‌رده‌وامییا بزاڤ و چالاكیێن زانكۆیا زاخۆ كر، ژلایه‌كێ دیتر پرۆفیسۆرێ هاریكار ئاماژه‌دا ب گرنگیا گێرانا كۆنفرانسێن زانستى و چێكرنا تێكه‌لیێن زانستى دناڤبه‌را ڤه‌كۆله‌ران یێن ناڤخۆ و ده‌رڤه‌یى هه‌رێما كوردستانێدا، هه‌روه‌سا پرۆفیسۆرێ هاریكار گۆت: گرنگه‌ كه‌رتێ حكومى و كه‌رتێ تایبه‌ت بوهایى كارێن زانستى و ڤه‌كۆلینێن ژ لایێ ڤه‌كۆله‌رێن ئه‌كادیمیڤه‌ دهێنه‌ ئه‌نجامدان بزانن و هاریكاریێن پر باش پێشكێشى وان بكه‌ن، ژبه‌ركو ته‌ڤایا ملله‌تان ب ڕێكا زانست و زانینێ پێش دكه‌ڤن. لدووماهییا په‌یڤا خۆ سه‌رۆكێ زانكۆیا زاخۆ سۆپاسیا ته‌ڤایا لایه‌نێن هاریكار، پشكدارێن كۆنفرانسى، سپۆنسه‌ر و مێهڤانێن هێژا كر و داخوازا سه‌ركه‌ڤتنێ بۆ وان د ژیان و كارێن زانستى و مرۆڤایه‌تیدا خوازت. ب ئه‌ڤێ چه‌ندێ دووه‌مین كۆنفرانسێ زانستیێ نیڤده‌وله‌تى یێ زانكۆیا زاخۆ ئه‌وێ لژێر دوریشمێ (زاخۆ: ژیان، شارستانى و كه‌لتوور) كو ل ڕۆژێن 18ـ19ـ20/ نیسانا/ 2017 هاتییه‌ گێران ب دووماهیك هات.