<< نووچەیێن

جڤینا شێستێ یا كۆم خه‌باتا كورمانجیێ ب موزیك و سترانێن فولكلۆى ب دووماهیك هات

19 May 2017

ل ڕۆژا پێنجشه‌مبێ ڕێكه‌ڤتى 18/5/2017 لده‌مژمێر (7:00) ئێڤارى ب ئاماده‌بوونا به‌رێز پرۆفیسۆر دكتۆر (عه‌بدولوه‌هاب خالد موسا) هاریكارێ سه‌رۆكێ زانكۆیا زاخۆ بۆ كاروباریێن قۆتابییان و به‌رێز (كه‌ندال نه‌زان) سه‌رۆكێ ئه‌نستتیۆتا كوردى یا پاریسێ و به‌رێز (ڕه‌شۆ زیلان) سه‌رۆكێ كۆم خه‌باتا كورمانجیێ و ئه‌ندامێن كۆم خه‌باتێ، هه‌روه‌سا ب به‌رهه‌ڤییا ڕاگر و مامۆستایێن زانكۆیا زاخۆ ڕێوره‌سمێن داویێ یێن جڤینا شێستێ یا كۆم خه‌باتا كورمانجێ ل زانكۆیا زاخۆ هاتنه‌ گێران.
لده‌ستپێكێ به‌رێز دكتۆر (عه‌بدولوه‌هاب خالد موسا) وه‌ك نوینه‌رێ سه‌رۆكێ زانكۆیا زاخۆ په‌یڤه‌ك پێشكێشكر، د په‌یڤا خۆ دا به‌رێزى سلاڤ و ڕێزێن به‌رێز پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ گه‌هاندن مێهڤانان، پاشان ئاماژه‌ ب كار و خه‌باتێن كۆم خه‌باتا كورمانجیێ ل زانكۆیا زاخۆ دا و ده‌ستخۆشى ل كارێ وان كر، هه‌روه‌سا پشته‌ڤانى و هاریكاریا زانكۆیا زاخۆ بۆ ئه‌نستتیۆتا كوردى یا پاریسێ و كۆم خه‌باتا كورمانجیێ دا دیاركرن، ژلایه‌كێ دیتر پرۆفیسۆرێ هاریكار باسێ خورتكرنا په‌یوه‌ندیێن ئه‌كادیمى دناڤبه‌را زانكۆیا زاخۆ و ته‌ڤایا سازیێن ئه‌كادیمى و زانستى یێن گرنگیێ ب زمان و چاندا كوردى ددن كر. لدووماهییا په‌یڤا خۆ دكتۆرى داخوازا سه‌ركه‌ڤتنێ بۆ كار و خه‌باتیێن زانستى و ئه‌كادیمى یێن كۆم خه‌باتا كۆرمانجى خوازت.
پاشان به‌رێز (ڕه‌شۆ زیلان) سه‌رۆكێ كۆم خه‌باتا كورمانجیێ یا سه‌ر ب ئه‌نستتیۆتا كوردى یا پاریسێڤه‌ په‌یڤه‌ك خواند، د په‌یڤا خۆ دا ناڤهاتى سوپاسیێن بێ هه‌مپا ئاراسته‌ى سه‌رۆكاتییا زانكۆیا زاخۆ بۆ مێهڤانداریا ڕێكخستى و پر باش كر، هه‌روه‌سا ئاماژه‌ ب خه‌باتا ئه‌ندامێن كۆم خه‌باتێ یا چه‌ند ڕۆژى ل زانكۆیا زاخۆ دا و ڕوونكرنه‌ك گشتى پێشكێشكر.
پشتى هه‌ر دوو به‌رێزان په‌یڤێن خۆ ب دووماهیك هیناین، به‌رێز پرۆفیسۆر دكتۆر (عه‌بدولوه‌هاب خالد)ى ئارمێ زانكۆیا زاخۆ وه‌ك دیارى پێشكێشى به‌رێز (كه‌ندال نه‌زان) سه‌رۆكێ ئه‌نستتیۆتا كوردى یا پاریسێ كر، هه‌روه‌سا چه‌ندین په‌رتووك و هژمارێن كۆڤارا ئه‌كادیمى یا زانكۆیا زاخۆ بۆ په‌رتووكخانه‌یا كۆم خه‌باتا كورمانجیێ پێشكێشى به‌رێز (ڕه‌شو زیلان) سه‌رۆكێ كۆم خه‌باتێ كرن.
هه‌ژییه‌ بێژین، كو د ئێڤاریا تایبه‌تدا په‌نه‌له‌ك بۆ به‌خشینا باوه‌رنامه‌یێن پشكداریێ د جڤینا شێستێ یا كۆم خه‌باتا كورمانجیێدا هاتبوو ته‌رخانكرن، و تێدا باوه‌رنامه‌ ب سه‌ر ئه‌ندامێن كۆم خه‌باتێ و لیژنا زانكۆيا زاخۆ يا به‌رهه‌ڤكارا جڤینێ هاتنه‌ پارڤه‌كرن. لدووماهییا ڕێوره‌سمان، هه‌ر دوو هۆنه‌رمه‌ندێن ناڤدرێن كوردستانێ به‌رێزان (سه‌باح زاخوى و حاجى زاخوى) ب موزیك و سترانێن كوردى یێن فولكلوى ئێڤارى ب داوى هینان.
جهێ ئاماژه‌ پێدانێ، كو جڤینا شێستێ يا كۆم خه‌باتا كورمانجيێ ب هه‌لكه‌ڤتا سیهـ سالیا دامه‌زراندنا كۆم خه‌باتێ بۆ ماوه‌یێ (7) ڕۆژان ل ناڤه‌ندا زانكۆیا زاخۆ ل هۆلا سه‌نته‌رێ ڕاهێنان و پێشخستنێ هاته‌ سازكرن.