<< نووچەیێن

زانكۆیا زاخۆ ئاهه‌نگا ده‌رچوونێ یا (گه‌ڕا حه‌فتێ ـ گه‌ڕا كوردستان) گێرا

12 October 2017

ل ڕۆژا پێنجشه‌مبێ ڕێكه‌ڤتى (12/10/2017) لده‌مژمێر (11:00) سپێدێ زانكۆیا زاخۆ لژێر دوریشمێ (ئێكرێزى به‌رێ بنیاتێ ده‌وله‌تا كوردستانێ یه‌) ب ئاماده‌بوونا به‌رێز دكتۆر (فه‌رهاد ئه‌تروشى) پارێزگارێ دهۆكێ، به‌رێز دكتۆر (داود سلێمان) نوینه‌رێ وه‌زیرێ خواندنا بلند و ڤه‌كۆلینێن زانستى و به‌رێزان ڕێڤه‌به‌رێن داموده‌زگه‌هێن حكومى و كه‌رتێ تایبه‌ت و ده‌زگه‌هێن ڕاگه‌هاندنێ و مامۆستا و قۆتابیێن زانكۆیێ ئاهه‌نگا ده‌رچوونێ يا (گه‌ڕا حه‌فتێ ـ گه‌ڕا كوردستان) بۆ سالا خواندنێ (2016ـ2017) ل هۆلا وه‌رزشى دناڤ كه‌مپێ زانكۆيێدا گێران.
لده‌ستپێكا ئاهه‌نگێ ئاماده‌بوویان وه‌ك ڕێزگرتن خۆله‌كه‌كا بێده‌نگیێ دگه‌ل سرودا نشتیمانیا (ئه‌ى ڕه‌قیب) لسه‌ر گیانێ ته‌ڤایا جانگۆریێن بزاڤا ڕزگاریخوازا گه‌لێ كورد ڕاوه‌ستیان، پاشان ڕێوره‌سمێن ئاهه‌نگێ ب په‌یڤا به‌رێز پرۆفیسۆر دكتۆر (عبدالوهاب خالد موسى) هاریكارێ سه‌رۆكێ زانكۆیێ بۆ كاروبارێن قۆتابییان ده‌ستپێكر، ناڤهاتى د په‌یڤا خۆ دا بخێرهاتنا ته‌ڤایا مێهڤانێن هێژا و قۆتابیێن ده‌رچوویێن گه‌ڕا حه‌فتێ كر، هه‌روه‌سا ئاماژه‌ ب پێكهاتێ زانكۆیێ و ژێرخانه‌یا ئابۆرى و زانستى دا. لدویڤدا به‌رێز پرۆفیسۆرێ هاریكار دكتۆر (لزگین عبدى جمیل) سه‌رۆكێ زانكۆیا زاخۆ په‌یڤه‌ك پێشكێشكر و ب هه‌مان شێوه‌ بخێرهاتنا مێهڤانێن هێژا و قۆتابیێن ده‌رچوویى كر، پاشان درێژى ب گۆتنا خۆ دا و باسێ چه‌ندین ته‌وه‌رێن گرنگ و ڕه‌وشا خواندنێ ل زانكۆیا زاخۆ و زانكۆیێن كوردستانێ ب گشتى كر، به‌رێز سه‌رۆكێ زانكۆیێ چه‌ندین مزگینیێن تایبه‌ت ڕاگه‌هاندن و ئاماژه‌ ب ڤه‌كرنا چه‌ندین فه‌كۆلتى و كۆلیژێن تایبه‌ت ل زانكۆیێ وه‌ك (فه‌كۆلتیا په‌روه‌ردا بنیات و كۆلیژا پزیشكى) دا، هه‌روه‌سا تیرۆژكه‌ك خسته‌ سه‌ر ڕه‌وشا نها یا هه‌رێما كوردستانێ تێدا دبوریت و پشته‌ڤانیا زانكۆیێ بۆ ئه‌نجامێ سه‌ركه‌ڤتیێ ڕیفراندۆمێ و ده‌وله‌تا كوردستانێ دیاركر.
پاشان به‌رێز دكتۆر (داود سلێمان) نوینه‌رێ وه‌زیرێ خواندنا بلند و ڤه‌كۆلینێن زانستى په‌یڤا وه‌زاره‌تا خواندنا بلند و ڤه‌كۆلینێن زانستى پێشكێشكر، د په‌یڤا وه‌زاره‌تێدا پیرۆزباهى ل قۆتابیێن ده‌رچوویى و زانكۆیا زاخۆ هاتنه‌كرن، هه‌روه‌سا به‌رێزى ئاماژه‌ ب سه‌ركه‌ڤتنێن زانكۆیا زاخۆ د بوارێ خواندنا بلند ل هه‌رێما كوردستانێ و جیهانێ دا و كه‌یفخۆشیا خۆ ب ڕۆلێ كارا یێ زانكۆیێ دناڤ زانست و جڤاكیدا ده‌ربرى و سلاڤێن تایبه‌ت یێن وه‌زیرێ خواندنا بلند گه‌هاندن سه‌رۆكێ زانكۆیێ، ئه‌ڤ چه‌نده‌ ژى ڕاگه‌هاند كو زانكۆیا زاخۆ د ته‌مه‌نێ خۆ یێ كێمدا كارییه‌ سه‌ركه‌ڤتنێن مه‌زن تۆمار بكه‌ت و بالا ڤه‌كۆله‌ر و زانكۆیێن ناڤخۆیى و جیهانى بۆ خۆ بكێشیت.
پشتى په‌یڤێن لسه‌رى دیاركرى ب دووماهیك هاتین چه‌ندین ڕێوره‌سمێن تایبه‌ت دناڤ ئاهه‌نگێدا هاتنه‌ ڕێكخستن، وه‌ك ڕیزگرتن ل مامۆستایێن خانه‌نشبوویى، ڕێزگرتن ل باشترین ڤه‌كۆله‌ر لسه‌ر ئاستێ زانكۆیێ، ڕێزگرتن ل باشترین ڤه‌كۆله‌ر لسه‌ر ئاستێ فه‌كۆلتى و كۆلیژان و ڕێزگرتن ل (پێنج) پشكێن خواندنێن يێن هه‌رى باش ل زانكۆيێ بۆ سالا خواندنێ (2016ـ2017) .
هه‌ژییه‌ بێژین، گه‌را ئه‌ڤ ساله‌ یا زانكۆیا زاخۆ ب (گه‌ڕا كوردستان) هاتبوو بناڤكرن و هژمارا قۆتابیێن ده‌رچوویى (838) قۆتابى بوو.