<< نووچەیێن

زانكۆیا زاخۆ و په‌یمانگه‌ها ته‌كنیكییا دهۆك یا تایبه‌ت ڕێكه‌ڤتنامه‌یه‌ك مۆركرن

07 February 2018

ل ڕۆژا چوارشه‌مبێ ڕێكه‌ڤتى (7/2/2018) لده‌مژمێر (11:30) سپێدێ، شانده‌كێ ژ په‌یمانگه‌ها ته‌كنیكییا دهۆك یا تایبه‌ت ب سه‌رۆكایه‌تییا به‌رێز (ئاراس رجب) ڕاگرێ په‌یمانگه‌هێ سه‌ره‌دانا زانكۆیا زاخۆ كرن و ژ ئالیێ به‌رێز پرۆفیسۆرێ هاریكار دكتۆر (لزگین عبدى جمیل) سه‌رۆكێ زانكۆیا زاخۆ و جڤاتا زانكۆیێ و به‌رێز دكتۆر (ئه‌حمه‌د حه‌مدى ئیبراهیم) ڕێڤه‌به‌رێ نڤێسینگه‌ها په‌یوه‌ندیێن نیڤده‌وله‌تى و ڕێڤه‌به‌رێ سه‌نته‌رێ ته‌كنۆلۆژیا زانیارى و ئامارێ و ڕێڤه‌به‌را سه‌نته‌رێ گه‌شه‌پێدانا كارى ب گه‌رمى هاتنه‌ پێشه‌وازیكرن.
جهێ ئاماژه‌پێدانێیه‌ كو هه‌ر دوو ئالیان ب هه‌ڤرا ل سه‌رۆكایه‌تییا زانكۆیا زاخۆ كۆمبوونه‌ك سازكرن و باس ل ڕه‌وش و دۆخێ نها یێ هه‌رێما كوردستانێ و ڕۆژهه‌لاتا ناڤه‌راست تێدا دبوریت كرن، پاشان ب ئاوایه‌كێ تایبه‌ت باس ل ڕه‌وشا خواندنا بلند و قوتابیێن زانكۆ و په‌یمانگه‌هێن هه‌رێما كوردستانێ هاته‌كرن. هه‌ژییه‌ بێژین كو ئارمانجا سه‌ره‌كى یا سه‌ره‌دانا شاندێ په‌یمانگه‌هێ بۆ زانكۆیا زاخۆ مۆركرنا ڕێكه‌ڤتنامه‌یه‌كا زانستى یا ل هه‌ڤگه‌هشتنێ دناڤبه‌را هه‌ر دوو لایاندا بوو، د ئه‌نجامدا و پشتى دانوستاندنه‌ك درێژ ڕێكه‌ڤتنامه‌ هاته‌ ئیمزاكرن و ته‌كه‌زى لسه‌ر جێبجێكرنا خالێن د ڕێكه‌ڤتنامه‌یێدا هاتنه‌كرن.
لدووماهییێ پرۆفیسۆرێ هاریكار دكتۆر (له‌زگین عبدى جمیل) سه‌رۆكێ زانكۆیێ په‌یڤه‌ك ده‌رباره‌یى چاوانییا جێبجێكرنا ڕێكه‌ڤتنامه‌یێ پێشكێشكر و د په‌یڤا خۆ دا ب گرنگى و پله‌ به‌رزى ڕێكه‌ڤتنامه‌ هه‌لسه‌نگاند و ده‌ستخۆشى ل لایه‌نێن ب ئه‌ڤى كارى ڕابووین كر، هه‌روه‌سا گۆت گرنگه‌ ڕێكه‌ڤتنامه‌یێن زانستى دناڤبه‌را گشت زانكۆ و سازیێن خواندنێدا ب به‌رده‌وامى بهێنه‌ دیتن، ژبه‌ركو كارێن وه‌ها دبن ئه‌گه‌رێ پێشخستنا زانستى و پرۆسێسا خواندنێ پێشڤه‌چوونه‌ك خورت بخۆڤه‌ دبینت، له‌ورا ئه‌م وه‌ك زانكۆیا زاخۆ ئاماده‌نه‌ پرۆتۆكول و ڕێكه‌ڤتنامه‌یێن زانستى دگه‌ل گشت زانكۆ و په‌یمانگه‌هێن خواندنێ مۆر بكه‌ن.