<< نووچەیێن

دكتۆر یوسف گۆران: جێبجێكرنا سیسته‌مێ (بۆلۆنیا پرۆسس) چاره‌سه‌ریا پرانییا كێشه‌یێن زانكۆیان دكه‌ت

27 February 2018

ڕێڤه‌به‌ریا ڕاگه‌هاندنا وه‌زاره‌تا خواندنا بلند و ڤه‌كۆلینێن زانستى:
به‌رێز وه‌زیرێ خواندنا بلند و ڤه‌كۆلینێن زانستى ڕاگه‌هاند: سیسته‌مێ (بۆلۆنیا پرۆسس) ب ئێك ژ باشترین سیسته‌مێن خواندنێ لسه‌ر ئاستێ جیهانێ دهێته‌ هژمارتن و ل پرانییا وه‌لاتێن پێشكه‌ڤتى یێن جیهانێ دهێته‌ جێبجێكرن، ژبه‌ر ئه‌ڤێ چه‌ندێ ب هه‌مان شێوه‌یێ زانكۆیێن (زاخۆ و چه‌رموو) دێ پشته‌ڤانییا زانكۆیێن دیتر ژى كه‌ن كو سیسته‌مێ (بۆلۆنیا پرۆسس) جێبجێ بكه‌ن.
ئه‌ڤ ڕاگه‌هاندنه‌ به‌رێز دكتۆر (یوسف گۆران) وه‌زیرێ خواندنا بلند و ڤه‌كۆلینێن زانستى ل ڕۆژا دووشه‌مبێ ڕێكه‌ڤتى (26/2/2018) د چوارچووڤه‌یێ سه‌رپه‌رشتیكرنا كۆمبوونه‌كا تایبه‌ت لدور چاوانییا برێڤه‌چوونا كاروبارێن سیسته‌مێ (بۆلۆنیا پرۆسس) ڕاگه‌هاند. هه‌ژییه‌ بێژین، كو د كۆمبوونێدا به‌رێزان دكتۆر (ئامانج سه‌عید) ڕاوێژكارێ وه‌زیرێ خواندنا بلند و ڤه‌كۆلینێن زانستى، پرۆفیسۆرێ هاریكار دكتۆر (له‌زگین عه‌بدى جمیل) سه‌رۆكێ زانكۆیا زاخۆ، به‌رێز دكتۆر (سه‌لاح ڕه‌زا) سه‌رۆكێ زانكۆیا چه‌رموو ئاماده‌بوون و باس ل چاوانییا جێبجێكرنا پرۆسێسا (سیسته‌مێ بۆلۆنیا) هاته‌كرن.
بۆ زانینا زانیاریێن زێده‌تر، سه‌ره‌دانا مالپه‌رێ فه‌رمیێ وه‌زاره‌تا خواندنا بلند و ڤه‌كۆلینێن زانستى بكه‌ن.