<< نووچەیێن

فه‌كۆلتیا په‌روه‌ردێ ناسناڤێ قاره‌مانییا ته‌پا پێیى بده‌ستخۆڤه‌هینا

01 May 2018

فه‌كۆلتیا په‌روه‌ردێ ل زانكۆیا زاخۆ ب سپۆنسه‌ریا كۆمپانیا (BIFA) قاره‌مانییه‌كا ته‌پا پێیى بۆ ماوه‌یێ (10) ڕۆژان لسه‌ر ئاستێ ته‌ڤایا كۆلیژ و فه‌كۆلتیێن زانكۆیێ ڤه‌كر، پشتى هه‌ڤركییه‌كا بهێز دناڤبه‌را هه‌مى تیماندا بۆ بده‌ستڤه‌هینانا ناسناڤێ قاره‌مانیێ هاتییه‌كرن، د ئه‌نجامدا هه‌ر دوو تیمێن (فه‌كۆلتیا په‌روه‌رده‌ و كۆلیژا ئه‌ندازیارى) شیان خۆ بگه‌هینن یاریا دووماهییێ. یاریا ناڤهاتى كو لسه‌ر برنا ناسناڤێ قاره‌مانییێ بوو ل ڕۆژا ئێكشه‌مبێ ڕێكه‌ڤتى (29/4/2018) ب ئاماده‌بوونا به‌رێز پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ و به‌رێز پرۆفیسۆر دكتۆر (عه‌بدولوه‌هاب خالد موسا) هاریكارێ سه‌رۆكێ زانكۆیێ و به‌رێز دكتۆر (لوقمان عه‌زیز عه‌بدولكه‌ریم) ڕاگرێ كۆلیژا ئه‌ندازیارى و به‌رێز پرۆفیسۆرێ هاریكار دكتۆر (شێرزاد زه‌كه‌ریا محه‌مه‌د) ڕاگرێ فه‌كۆلتیا په‌روه‌ردێ هاته‌ ئه‌نجامدان.
هه‌ر دوو تیمان گڤاشتن و هێرشێرن توند لسه‌ر گۆلێن هه‌ڤكرن و یاریه‌كا بهێز و پڕ ژ گیانێ وه‌رزشى دناڤبه‌را هه‌ر دوو تیماندا هاته‌كرن، و د ئه‌نجامدا تیما ڤه‌كۆلتیا په‌روه‌ردێ كارى سه‌ركه‌ڤتنێ ب (4) گۆلان ل به‌رامبه‌ر (1) گۆلێ تۆماربكه‌ت و ناسناڤێ قاره‌مانییێ بده‌ستخۆڤه‌ بینت.