<< نووچەیێن

زانكۆيا زاخۆ ئاهه‌نگا ده‌رچوونا گه‌ڕا (8) يا قوتابييان گێرا

14 October 2018

ل ڕۆژا ئێكشه‌مبێ ڕێكه‌ڤتى (14/10/2018) لده‌مژمێر (4:00) ئێڤارى ب ئاماده‌بوونا به‌رێز دكتۆر (یوسف گۆران) وه‌زیرێ خواندنا بلند و ڤه‌كۆلینێن زانستى و به‌رێز پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیێ و هاریكارێن سه‌رۆكێ زانكۆیێ و ڕاگرێن كۆلیژ و فه‌كۆلتیان، ئه‌ندامێن په‌رله‌مانێ كوردستانێ و ئیراقى، ڕێڤه‌به‌رێن داموده‌زگه‌هێن حزبى و حكوومى، مامۆستا و قۆتابیێن زانكۆیێ، لژێر دوریشمێ (زانكۆ بنگه‌هێ زانین و پێشكه‌ڤتنێ یه‌) زانكۆیا زاخۆ ڕێوره‌سمێن ئاهه‌نگا ده‌رچوونا گه‌ڕا (8) یا قوتابییان ل یاریگه‌ها نێڤده‌وله‌تى ل باژێرێ زاخۆ گێران. لده‌ستپێكا ئاهه‌نگێ ئاماده‌بوویى وه‌ك ڕێزگرتن ل گیانێ پاكێ شه‌هیدێن كوردستانێ خۆله‌كه‌كێ ب بێده‌نگى ڕاوه‌ستیان، پاشان دگه‌ل سرۆدا زانكۆیا زاخۆ قوتابى ده‌ربازى ناڤا یاریگه‌هێ بوون و لسه‌ر مافۆرا سۆر برێڤه‌چوون.
به‌رێز پرۆفیسۆر دكتۆر (عه‌بدولوهاب خالد موسا) هاریكارێ سه‌رۆكێ زانكۆیا زاخۆ بۆ كاروبارێن قوتابییان په‌یڤا بخێرهاتن و پیرۆزباهیێ پێشكێشكر و ئاماژه‌ ب بزاڤ و چالاكیێن ئه‌كادیمى یێن زانكۆیێدا و ڕۆلێ زانكۆیا زاخۆ د بلند ڕاگرتنا ئاستێ زانستیدا به‌رز نرخاند. لدویڤدا په‌یڤا سه‌رۆكایه‌تییا زانكۆیا زاخۆ ژ ئالیێ به‌رێز پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ ڤه‌ هاته‌ خواندن، به‌رێزى د په‌یڤا خۆ دا پیرۆزباهى ل ده‌رچوویێن گه‌ڕا (8) كرن و خوازت ب پسپۆرى و زانینا خۆ خزمه‌تا گه‌ل و وه‌لاتێ خۆ بكه‌ن و ببن هێمایێن زانین و زانستێ، سه‌رۆكێ زانكۆیا زاخۆ ئاماژه‌دا ب ڕۆلێ مه‌عریفى یێ زانكۆیێ د پێشئێخستنا وه‌لاتیدا. هه‌روه‌ها ڕێزدارى گۆت كو زانكۆیا زاخۆ لدوی بنه‌ما و تایبه‌تمه‌ندیێن زانستى كار دكه‌ت و د ماوه‌یه‌كێ كێمدا كو هه‌شت سالن شیایه‌ ڕۆله‌كێ گرنگ د پێشڤه‌برنا ئاستێ زانستى ل هه‌رێما كوردستانێ و ئیراقێدا ببینت.
هه‌روه‌سا په‌یڤا وه‌زاره‌تا خواندنا بلند و ڤه‌كۆلینێن زانستى ژ ئالیێ ڕێزدار دكتۆر (یوسف گۆران) وه‌زیرێ خواندنا بلند هاته‌ پێشكێشكرن، ناڤهاتى د په‌یڤا خۆ دا باسێ زانكۆیا زاخۆ كو زانكۆیه‌ك نوى و پێشكه‌ڤتییه‌ كر، هه‌روه‌سا پیرۆزباهى ل قوتابیێن ده‌رچوویى كر و خوازت پاشه‌رۆژه‌ك گه‌ش و تێر زانین و خزمه‌ت هه‌بن. وه‌زیرى د په‌یڤا خۆ دا باسێ سیسته‌مێن خواندنێ ل زانكۆیا زاخۆ كر و ب باشى كار و بزاڤێن زانكۆیێ و ڕۆلێ وێ د پێشڤه‌برنا جڤاكێ كوردستانێدا نرخاند.
هه‌ژى گۆتنێیه‌، كو په‌یڤا قوتابییان ژ ئالیێ به‌رێز (ئاشتى حكیم) هاته‌ خواندن، ناڤهاتى لده‌ستپێكا په‌یڤا خۆ پیرۆزباهى لسه‌رجه‌م قوتابیێن ده‌رچوویى كر و داخوازا ڤه‌دیتنا كار و پێشكێشكرنا خزمه‌تێ د بوار و پسپۆریێن واندا ژ ئالیێن په‌یوه‌ندیدار كر، هه‌روه‌سا نوینه‌رێ قوتابییان باسێ چوار سالێن خواندنێ ل زانكۆیێ و ڕۆلێ ماموستا و فه‌رمانبه‌ران د پێشكێشكرنا زانست و خزمه‌تێن ئه‌كادیمدا كر، ژ لایه‌كێ دیتر باس ل پرۆسێسا وه‌رگرتنا قوتابییان بۆ سالا خواندنێ (2018ـ2019) كر و خوازت ب هه‌موو شیانان دگه‌ل قوتابیێن پۆلا دوازدێ هاریكار و پشته‌ڤان بن.
پشتى په‌یڤێن لسه‌رى دیاركرى ب دوماهیك هاتین، هه‌ر ئێك ژ ڕاگرێن كۆلیژ و فه‌كۆلتیان داخوازى ژ جه‌نابێ سه‌رۆكێ زانكۆیێ كرن كو لدویڤ مه‌رجێن زانستى باوه‌رنامه‌یان ب قوتابییان بده‌ت، ژ لایێ خۆ ڤه‌ سه‌رۆكێ زانكۆیێ داخوازیا وان په‌سه‌ندكر و باوه‌رنامه‌ لدویڤ پسپۆریان ب قوتابییان به‌خشین. لدوماهیێ گرنگه‌ بێژین، كو د ئاهه‌نگا ده‌رچوونا گه‌ڕا (8) یا قوتابییاندا زانكۆیا زاخۆ شیا باوه‌رنامه‌یێن به‌كالۆریوسێ ب (1028) قوتابییان ب پسپۆریێن جوداجودا بده‌ت.