<< نووچەیێن

ئێكه‌مین كۆنفرانسێ نێڤده‌وله‌تیێ زانستێ پێشكه‌ڤتى و ئه‌ندازیارى (2018 ICOASE) هاته‌ گێران

09 October 2018

ل ڕۆژا سێشه‌مبێ ڕێكه‌ڤتى (9/10/2018) لده‌مژمێر (9:00) سپێدێ ل هۆلا كۆنفرانسان ل باژێرێ دهۆكێ ڕێوره‌سمێن ئێكه‌مین كۆنفرانسێ نێڤده‌وله‌تیێ زانستێ پێشكه‌ڤتى و ئه‌ندازیارى (2018 ICOASE) ئه‌وێ ژ ئالیێ زانكۆیا زاخۆ و زانكۆیا پۆلیته‌كنیك يا دهۆكێ و ب پشته‌ڤانى و چاڤدێریا (IEEE) هاتییه‌ ڕێكخستن، ده‌ستپێكرن.
لده‌ستپێكا كۆنفرانسى ئاماده‌بوویان وه‌ك ڕێزگرتن لسه‌ر گیانێ پاكێ شه‌هیدان خۆله‌كه‌كێ ب بێده‌نگى دگه‌ل هه‌ر دوو سرودێن نیشتیمانى یێن (ئیراق و كوردستانێ) ڕاوه‌ستیان، پاشان ب په‌یڤا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ برگه‌ و په‌نه‌لێن كۆنفرانسى ده‌ستپێكرن، به‌رێزى د په‌یڤا خۆ دا بخێرهاتنا گشت مێهڤانێن ئاماده‌بوویى و سه‌رۆكێن زانكۆیان و هه‌ر دوو وه‌زیرێن (خواندنا بلند و په‌روه‌رده‌یێ) یێن كابینه‌یا بۆرى یا حكومه‌تا هه‌رێما كوردستانێ كر. سه‌رۆكێ زانكۆیێ بالكشاند لسه‌ر كار و چالاكیێن كۆنفرانسى و ب ئاوایه‌كی هویربین هه‌ر تشتێ پێدڤى ڕۆنكر. هه‌روه‌سا ڕێزدارى د په‌یڤا خۆ دا گۆت، كو زانكۆیا زاخۆ ژ بۆ به‌رزكرنا ئاستێ زانستى و مه‌عریفى ئاماده‌یه‌ پرۆتوكولان دگه‌ل گشت ناڤه‌ندێن زانستى و ئه‌كادیمى مۆر بكه‌ت و خزمه‌ته‌ك پڕباش پێشكێشى جڤاكێ كوردستانێ و مرۆڤایه‌تیێ ب گشتى بكه‌ت.
لدویڤدا ڕێزدار دكتۆر (عه‌دنان محسن عه‌بدولعه‌زیز) سه‌رۆكێ زانكۆیا پۆلیته‌كنیك یا دهۆكێ ب هه‌مان شێوه‌ خۆشحالى و به‌خته‌وه‌ریا خۆ ب سازكرنا ئێكه‌مین كۆنفرانسێ زانستیێ هه‌ڤپشك ده‌ربرى و سوپاسێن خۆ ئاراسته‌یى ڤه‌كۆله‌رێن پشكدار یێن ناڤخوه‌یى و ده‌رڤه‌یى وه‌لاتى و لیژنه‌یێن ڕێكخستنێ كرن، هه‌روه‌سا ناڤهاتى داخوازا سه‌ركه‌ڤتنێ بۆ پشكدارێن كۆنفرانسى و بۆراندنا ده‌مه‌ك خۆش تێر زانین كر.
گرنگه‌ بێژین، كو په‌یڤا وه‌زاره‌تا خواندنا بلند و ڤه‌كۆلینێن زانستى ژ ئالیێ به‌رێز دكتۆر (نه‌ژده‌ت ئاكره‌یى) نوینه‌رێ وه‌زیرێ خواندنا بلند و ڤه‌كۆلینێن زانستى ڤه‌ هاته‌ پێشكێشكرن. ڕێزدارى د په‌یڤا خۆ دا ب ئاوایه‌كێ ئه‌كادیمى و زانستیانه‌ ئێكه‌مین كۆنفرانسێ نێڤده‌وله‌تیێ زانستێ پێشكه‌ڤتى و ئه‌ندازیارى هه‌لسه‌نگاند و خوازت گشت سازى و زانكۆ كارێن وه‌ها گرنك و پێشكه‌ڤتى ئه‌نجام بده‌ن، هه‌روه‌ها نوینه‌رێ وه‌زیرى ب ڕه‌نگه‌كێ گشتى باسێ گرنگیا كۆنفرانسێن وه‌ها كر و ئاماژه‌ ب پلانێن داهاتى یێن وه‌زاره‌تێ دا و ده‌ستخۆشێن تایبه‌ت ل گشت پشكدار و ڤه‌كۆله‌ران كر.
په‌یڤا ڕێڤه‌به‌رێ كۆنفرانسى ب زمانێ ئینگلیزى ژ ئالیێ ڕێزدار پرۆفیسۆرێ هاریكار دكتۆر (یاسین تاها مسته‌فا) هاریكارێ سه‌رۆكێ زانكۆیا زاخۆ بۆ كاروبارێن زانستى و خواندنا بلند هاته‌ پێشكێشكرن، ڕێزدارى د په‌یڤا خۆ دا گشت ئالیى و میكانیزمێن كۆنفرانسى ڕۆنكرن، هه‌روه‌سا مه‌به‌ست و ئارمانجێن تایبه‌ت پێشچاڤكرن و ب درێژى لسه‌ر قۆناغێن كاركرن و بزاڤێن سه‌رخستنا كۆنفرانسى ڕاوه‌ستیا.
پاشان ڕێزدار دكتۆر (ستار بدران) نوینه‌رێ (IEEE) ل وه‌لاتێ ئیراقێ ب زمانێ عه‌ره‌بى گۆتنه‌ك پێشكێشى ئاماده‌بوویان كر و پیرۆزباهیێن بێ سینۆر ئاراسته‌یى هه‌ر دوو زانكۆیێن ب كارێ سازكرنا كۆنفرانسى ڕابووین كرن، هه‌روه‌سا ناڤهاتى پشته‌ڤانییا خۆ بۆ كارێن وه‌ها گرنگ و زانستیانه‌ ده‌ربرى و باس ل چه‌ندین پلان و پرۆژه‌یێن بۆرى و داهاتى یێن سازیا (IEEE) ل وه‌لاتێ ئیراقێ كر.
لدوماهیێ په‌یڤا كۆنفرانسى ژ ئالیێێ ڕێزدار دكتۆر (ئیدریس هادى) هاته‌ خواندن، به‌رێزى ب هه‌مان شێوه‌ پیرۆزباهییا ئاماده‌كارێن كۆنفرانسى كر و داخوازا سه‌ركه‌ڤتن و كارێن پێشكه‌ڤتى بۆ هه‌ر دوو زانكۆیان خوازت، پاشان دكتۆر (ئیدریس)ى سمیناره‌ك لسه‌ر ڕۆلێ وه‌زاره‌تا خواندنا بلند و ڤه‌كۆلینێن زانستى ل هه‌رێما كوردستانێ د به‌ره‌ڤ پێشڤه‌برنا ئاستێ زانستیدا پێشكێشكر و چه‌ندین كار و چالاكیێن وه‌زاره‌تێ ڕۆن و شرۆڤه‌كرن.
هه‌ژى گۆتنێه‌، كو (270) ڤه‌كۆلین ژ ئالیێ ڤه‌كۆله‌ران ڤه‌ ل سه‌نسه‌رى جیهانێ بۆ كۆنفرانسى هاتبوونه‌ شاندن، پشتى لیژنه‌یێن كۆنفرانسى لسه‌ر ڤه‌كۆلینان ڕاوه‌ستیان (97) ڤه‌كۆلین بۆ پێشكێشكرنێ په‌سه‌ندكرن و بریاره‌ د ماوه‌یێ سێ ڕۆژاندا ل زانكۆیا پۆلیته‌كنیك و زانكۆیا زاخۆ بهێنه‌ پێشكێشكرن.

For More Information, try to visit the conference Website